آثار حبوب منع الحمل بعد تركها
ماذا يحدث عند التوقف عن تناول أقراص منع الحمل؟
كما هو شائع، يتجه معظم السيدات لتناول أقراص منع الحمل بنوعيها سواء كانت الحبوب المركبة COC ودى اختصارا لكلمة compound oral contraceptive وتسمى بالمركبة لأنها بتحتوى على خليط من هرموني الاستروجين والبروجيستين، أو النوع الثانى اللى اسمه Mini pills ودي مفيهاش الا البروجيستين بس.
الحبوب دى بتشتغل عن طريق انها تعمل negative feed back يعني انا بدي الجسم هرمونات خارجية بتركيزات صغيرة علشان يوقف افراز الهرمونات الطبيعية كرد فعل عكسي واللي بتكون مسئولة عن عملية التبويض. يعنى الهرمونات الخارجية اللي انا بديها من برة دي بتروح على الغدة النخامية anterior pituitary وتعملها negative feed back فالغدة تتوقف عن العمل ومتطلعش ولا FSH ولا LH وبالتالى يتوقف التبويض وميحصلش حمل. ومش بس كدة دي بتروح كمان تعمل negative feed back على اللى منطقة في المخ اسمها تحت المهاد Hypothalamus وبتوقفه عن العمل وميطلعش هرمون Gn RH وده اختصار Gonadotropin releasing hormone.
الهرمون ده هوا اللي بيروح للغدة النخامية وينشطها ويخليها تطلع FSH and LH. اول هرمون فيهم FSH يروح يشتغل على البويضات فى المبيض ويكبرها وكمان يطلع هرمون الاستروجين بينما الهرمون الثانى LH مسئول عن خروج البويضة من الجراب بتاعها وحصول التبويض وبعد كدة الجراب ده بيتحول الى الجسم الاصفر Corpus luteam ويفرز بروجيستيرون. ده باختصار شديد الوضع الطبيعى اللي بيحصل بدون تناول موانع الحمل.
حبوب منع الحمل بتمنع كل ده. مفيش GnRH ومفيش FSH ومفيش LH وبالتالى مفيش افرازات طبيعية للاستروجين والبروجيستيرون ومفيش تبويض ولا حمل كمان.
الدورة بعد توقف حبوب منع الحمل؟
لما الست تتوقف عن حبوب منع الحمل. طبيعى بترجع لها الدورة الطبيعية بتاعتها وتقدر تحمل عادى وده غالبا بيتم فى اول شهرين من التوقف عن الحبوب بس. ولكن وجدوا ان بعض السيدات بتفضل الدنيا عندهم عطلانة شوية ومش بينزل عليها دورة خالص لمدة تصل الى 6 شهور كاملة وده غالبا بيحصل بسبب ان منطقة تحت المهاد hypothalamus واللي بيكون ليها اليد العليا يتم وقف نشاطها لفترة "suppressed" على الرغم من توقف الحبوب بس بتكون أقصى مدة لتوقف نشاطه هى 6 شهور والفترة دى بيطلق عليها فى الطب Post pill amenorrhea يعنى انقطاع الطمث الناتج عن التوقف عن الحبوب. انما بعد كدة الدورة بتنزل عادى جدا والست تقدر تحمل.
عشان كدة الافضل عدم التدخل علاجيا او اعطاء كورسات تنشيط او ادوية لتنزيل الدورة الا بعد مرور مدة اقصاها 6 شهور. انما لو استمر الوضع بعد 6 شهور يبقى ساعتها لازم الست تعمل كشف طبي وتعرف ايه سبب عدم نزول الدورة؟